Отправляет email-рассылки с помощью сервиса Sendsay
Открытая группа
1196 участников
Модератор Andrew Blessed

←  Предыдущая тема Все темы Следующая тема →
пишет:

Акафист Преподобному Гавриилу (Ургебадзе)

 

 

 

Акафист Преподобному Гавриилу (Ургебадзе)

 

По благословению Манглисско - Цалкского Митрополита Анания (Джапаридзе)
 

Акафист Преподобному и Богоносному Отцу Нашему Гавриилу

 

 

 

 

Святый преподобне, исповедниче и юродиве

Архимандрите Гаврииле, моли Бога о нас!

 

 

 

 

Тропарь



Яко Владыка Христос Божественное естество Свое / человеческим сокрыл еси, / и тако нам незримым соделал еси / несказанное Величество Свое,/ ты же, всехвальный отче Гаврииле, /Ему уподобился еси, / подвигом юродства сокрывый духовное сияние твое,/ и исповедничеством Веры ставый пастырем истинным,/ преподобный отче Гаврииле, // моли Христа Бога спастися душам нашим.

 

 

Кондак


Необъятно еси милосердие Божие, / Егоже благостию лицезреем мы создание Им освященное,/ ты же отче преподобне,/ образ Создателя твоего в себе утвердил еси,/ и вознесл еси страданиями естество твое в подобие Божие,/ темже славим тя, отче Гаврииле, / яко достоин еси ты всякия похвалы, / иже был еси на земли цевницею правды, проповедником любви и голубем чистоты,/ а твоим всечудным смирением / открыл еси миру кладезь мудрости,/ и ныне на Небесе ты еси // ходатаю милосердия Божия и нашего спасения.


Величание

 

Ублажаем тя, / преподобне отче Гаврииле, / и чтим святую память твою, / наставниче монахов / и собеседниче ангелов. 


Молитвами святых отец наших, Господи Иисусе Христе, Боже наш, помилуй нас, аминь. 


Слава Тебе, Боже наш, слава Тебе. Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас. (Трижды) 

 

Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды) 

 

Слава Отцу и Сыну и Святому Духу, и ныне и присно и во веки веков. Аминь. 

 


Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.


Господи, помилуй. (12 раз): Слава Отцу и Сыну и Святому Духу. И ныне и присно и во веки веков. Аминь. 


Приидите, поклонимся Цареви нашему Богу. (Поклон) ;

Приидите, поклонимся и припадем Христу, Цареви нашему Богу. (Поклон);

Приидите, поклонимся и припадем Самому Христу, Цареви и Богу нашему. (Поклон);

псалом 50-й,

Помилуй мя, Боже: Верую:

 

А К А Ф И С Т

 

Кондак 1

Пением немолчным восхвалим житие и чудеса твоя, о всехвальне отче Гаврииле, ты яко великое светило рода Иверского воссиял еси, и ныне молением сердечным усердно взываем ти, яко всемощному заступнику нашему и ходатаю пред Господом - призри на ны, отче святый, и защити в скорбех и искушениях, и отеческим дерзновением твоим отжени от нас болезни и напасти, умоли о нас всесильнаго Бога не попустити нам блуждати по распутиям греховным, и от лукавого исхити восхваляющих и поющих ти сице: Радуйся, святый исповедниче и Христа ради юродиве, преподобный отче наш Гаврииле!

 

Икос 1 

Яко Израилю яви Господь пророки, зла обличители и пред Богом за люди Его ходатаи, тако и тя, отче, благослови Христос на дела великие, видяще широту сердца твоего, и аки юродива, наставника и молитвенника дерзновеннаго явил нам еси, обличителем беззакония века и рода своего. Темже издетства посвятил ты ся служению Богови, нашего ради спасения, от страстей греховных и бед избавляюще нас. Обаче и по святой кончине твоей неотступно следуеши обету твоему, тепле печешися о людях ти притекающих, и орлиным взмахом крил являеши помощь твою всем сущим в печалех и скорбех, терзаемым духами злобы, и исцеления щедро даруеши сице тебе вопиющим:

 

Радуйся, кротость и смирение с младенчества возлюбивый; Радуйся, непорочности души и тела усердный хранителю; Радуйся, сосуде избранный, святости уделе; Радуйся, измлада таин Вседержителя великий носителю;

Радуйся, обоюдоостре мече Господень, неверных разяяй; Радуйся, слабоверных в Вере укрепителю и истины поборниче; Радуйся, проповедниче любви вседивный; Радуйся, кающихся грешников наставниче;

 

Радуйся, в схватке с богоборцами Христа-Спасителя истинный служителю; Радуйся, последних времен Столпе Лучезарный; Радуйся, Великий Архимандрите и старче, духовниче всея Иверии; Радуйся, Свыше посланный ради очищения рода твоего;

 

Радуйся, святый исповедниче и Христа ради юродиве, преподобне отче наш Гаврииле!



Кондак 2

Враги веры истинной, власть захвативши в стране нашей, учиниша гонение велие церкви Христовой и пастве ея, и напасть подобную претерпети могоша токмо избранные, непоколебимые духом истинные Веры исповедники. Ты же, будучи с младых лет сосудом Богоизбранным, аще и чадо родителей неверующих, обаче Духом Святым преисполненный, и во дни гонений впитал еси с радостью благоухающий источник жизни Вечныя, величая выну Светодавца и Творца мира:

Аллилуия!



Икос 2


Издетства, достоблаженне отче, образе смирения и богомыслия был еси, далече от всякия детския беспечносте, и услыша еще в отрочестве раннем имя Христа, притекл еси в церковь Святой Варвары и, увидеше Спасителя на Кресте, с плачем возопи к Нему, яко живому: «Почто распяли Тя?» И услыша ответ служителя, „историю" Христа узнати твердо решил еси, тако Святое Евангелие по горнему наитию купил еси и оттоле до конца дней твоих в Слове Божием поучался еси. У Него же испроси, милостивый отче наш, окропити нас росою благодати Своея, дабы сердца наши горели неугасимым огнем Святого Евангелия и воспевали ти сице:

 

Радуйся, от утробы материнския, аки Самуил-пророк, Богу посвященный; Радуйся, духовным светом озаренный, и во мгле безбожия лучом познания блиставый; Радуйся, разумом своим от забот мирских удаливыйся и Богу приближенный; Радуйся, от отроческих лет избранный и благодатью Божией просвещенный; Радуйся, искреннею душой, непорочным разумом и жаждой глагола Божиего выну движимый; Радуйся, душу свою уделом токмо Христа Царя предначертавый;

 

Радуйся, измлада влечением к Богу отмеченный и Священным Писанием оживленный; Радуйся, духовое всеоружие на плечи детския взваливый; Радуйся, резвость детскую на воздвижение церквей променявый; Радуйся, растлевающия душу утехи возненавидевый; Радуйся, сердце свое и плотские желания распявый; Радуйся, благую силу и мудрость Новаго Завета - истиной, а знание святости - опытом жития твоего являвый; 

  

Радуйся, святый исповедниче и Христа ради юродиве, преподобне отче наш Гаврииле!

 


Кондак 3

Видяше неугасимый жар любви твоей ко Господу, коварный зверь, враг святости, взбесися неистово и набросившися на тя, ударил еси нечистой лапой главу твою, негодующе вопияше отроку ревностному: «Да не подымеши очей твоих на небо более!», обаче, смело вооруживыйся Крестом Господним и крепостию Его, стойко воспротивился еси ты, отроче богоизбранный, напастям вражиим. Помыслом же горним узрев храм, имя Святого Георгия носивый и родителем твоим разрушенный, с молитвой благоговенно подъял еси рукама твоима камни храмове и, уложивый их чудным образом, разумение человеков превосходящим, с радостью и любовью Бога благодарил еси, воспевая Ему:

Аллилуия!


Икос 3

Смущенна сицевою ревностностию твоею, бросила мати твоя Святое Евангелие в место неподобное, обаче ты, яко сокровище честнейшее со слезами очистивый, дом твой покинул еси и отроком двунадесяти лет в монастырь поспешил еси, иноческой жизни паче всего желая, обаче возрастом мал бе, и благословения не получил еси. И дни и ночи среди плит в дворах церковных проводил еси, величая Бога и не печася о мразе и гладе. И ныне, отче наш, моли Господа Бога подати нам мудрости сердечной дабы уразумети добро и зло, дабы пути дольней жизни нашея пройти праведно и обрести сицевое блаженное вдохновение и нам, восхваляющим и поющим ти:

 

Радуйся, веры гонимой пламенный исповедниче; Радуйся, неверием беснующихся посрамивый; Радуйся, пламенных веры искателей крепкий заступниче;

 

Радуйся, пустые утехи ненавидивый и порицания с благодарением принимавый; Радуйся, ночи в молитвах проводивый и почиванием на ложе жестком тело твое удручавый; Радуйся, беспечность юности постом и трудолюбием сокрушавый;

 

Радуйся, от ополчений демонов невидимых нас ограждающий; Радуйся, Авраамова гостеприимства подражателю; Радуйся, от глада спасающий и милосердием нищих одаряющий; Радуйся, грешников сладости воздержания научающий; Радуйся, нищих и бедствующих надеждо; Радуйся, греховных помыслов отгонителю;

 

Радуйся, святый исповедниче и Христа ради юродиве, преподобне отче наш Гаврииле!



Кондак 4

В малой келии двора твоего уединения выну искал еси, усердно в молитве и чтении Святаго Евангелия подвизаясь, очи сердечныя горе присно устремлял еси, напояя душу твою животворною росою благодати Духа Святаго, и ревнуя зело о тесноте жития твоего, тем и добродетели обильно стяжал еси, и в смирении твоем глубин истин Божиих достигл еси, и сподобился еси узрети явление на небе Лучезарного Креста, и принял е яко горнее знамение - яко Крест Голгофы твоея, величая Творца и Живодавца Христа Бога:

Аллилуия!



Икос 4


Божьим промыслом притекл еси, отче, на гору святую, Мтацминда, в церковь Давида Гареджийскаго, и зде научился еси чтению псалтыри и в учении христианском утвердился еси, и не щадя сил твоих неустанно подвизался еси, святому храму служа, и, промыслом Божиим, яко саженец близ ручья, в пору свою плод добрый взрастил еси. Тако и покрый нас, блаженне, от грехов и искушений мира, дабы страшитися нам убогого разума нашего, но жити выну в воли Божией, благодати горния стяжая, сего ради благоговейно взываем ти:

Радуйся, мысленными очима Господа непрестанно зревый; Радуйся, смирением яко светом одеянный; Радуйся, сокрытое от мудрецов и книжников познавый;

Радуйся, усердным постом и неустанными трудами закаливыйся и молитвою непрес-танною пронизавыйся; Радуйся, нечаянное проявление греха скорбию, стенаниями и слезми изжигавый;
Радуйся, крепостию неколебимой малодушным и слабым помощниче; Радуйся, душ верующих укрепителю и вражиих сил устрашителю;

Радуйся, величия Христа превозносителю и разнузданности богоборцев сокрушителю; Радуйся, тщеславия сильных мира, от лукавого зверя идуща, попирателю; Радуйся, души христиан, от многолетнего гнета нечестивых страждущие, ободривый; Радуйся, слабых и немощных укрепителю; Радуйся, ищущих Истину на пути Господни наставителю;


Радуйся, святый исповедниче и Христа ради юродиве, преподобне отче наш Гаврииле!


                                                                      
Кондак 5


Яко с усилением нечестия и гонений на верующих многие от жизни монастырской отрешились суть, и по понуждению, от страха смертнаго, в дольние селения притеча и приступиша к жизни мирския, ты же, отче, стезю тесную крепко избрал еси, ведущую к радости непреходящей, и Сионский храм стойко охранял еси, с верностью алтарю служаще. Нечестивии храмы Божии разоряша, ты же церковь в притворе дому твоего построил еси, и непрестанно святые иконы и кресты искал еси, обретая их поруганными в неподобающих местах, и, благолепно украшавше их, в храме твоем помещал еси, идеже мы с радостью их и ныне почитаем, отче наш, с умилением воспевая Богу:

Аллилуия! 



Икос 5 

Яростным мщением за пламенную ревность твою, множество бед от зверя коварного на тя навалилися суть, дабы потушити огнь рвения твоего ко Господу. Якоже попустил Господь скорби Иова Многострадального, дабы верность его испытати, темже же и ты, отче, козней бесовских не устрашился еси, и трижды разрушенную церковь паки воздвигнул еси, кийждо паче благолепнее ея сотворив, яко благослови Господь труд сей благий, и меры песка Ангелы подавали ти суть, и ныне, отче, моли Христа Бога всякое зло отженити от ны, в скорбех укрепити и поставити на стезю покаяния, темже с радостию и любовию взываем ти: 
Радуйся, во граде велием, яко пустынник, мира соблазны отринувый; Радуйся, во граде велием, яко пустынник, мира соблазны отринувый; Радуйся, немощи иных на себя взваливый; Радуйся, всякое уныние, от лукаваго сущее, горячею молитвою искоренивый; 
Радуйся, Духом Святым окрыленный, ряды врагов невидимых сокрушивый; Радуйся, Священным Писанием закаливыйся и мудростию совершенным ставый; Радуйся, ангелов соратниче и братий порочных исправителю; Радуйся, к бдению и трезвению всех призываяй; 
Радуйся, чудотворную Вратарницу Иверскую, главнейшую заступницу Грузии, вельми возлюбивый; Радуйся, спасенными дивными образами Храм твой убравый; 
Радуйся, огненныя любве ко Господу в сердцах наших воспламенителю; Радуйся, пред Богом сладчайший о иверах ходатае; Радуйся, ко Трапезе Господней на Небесе любви нашей преподносителю; 
Радуйся, святый исповедниче и Христа ради юродиве, преподобне отче наш Гаврииле! 

 

Кондак 6

Рвение твое о Господе узревый, Епископ Гавриил Кутатели в церкви Святых Мучеников послушником поставил тя еси, ты же, с юности познавый Христа и благодать Его стяжати паче всего вожделев, к иноческой жизни единой стремился еси, дабы мирския попечения отринути и величити присно Господа и тако спасти душу твою. И, Божиим промыслом, отче, благословление облачитися в рясу иноческую получил еси, и по желанию твоему имя Гавриила Афонского нарекли ти, а ныне вкупе лицезрите Господа славы - Спаса нашего, умолите Его святые да по примеру вашему путь жизненный наш временный неукоризненно проидем, воспевая присно в Троице Единосущнаго Бога:

Аллилуия!


Икос 6

Божиим благоволением рукоположение в сан иерея получивый, всецело очи сердечныя к Богу устремил еси, отче, и безупречно Богослужение блюсти возревновал еси, обаче, устрашишася властей, домашнии твои в мир задумали вернути ти и прияти супружество заставити тя, но невменяемым ты притворился еси и сокрушил еси козни родственных твоих, ибо единому Всевышнему Богу посвятил ты ся еси безвозвратно, и тако искушения ближних твоих победил еси и не смели паче воле твоей противитися. Затим и уповаем на тя, отче наш, молитвою твоей воспламени сердца наши огнем Божественным, во еже угодити Господеви, темже приносим ти хва-лебную песнь:

Радуйся, истиннаго монашескаго делания, Богу лишь ведомого, ревнителю; Радуйся, суровыми обетами душу твою закаливый; Радуйся, в недугах твоих силу Божественную проявивый;

Радуйся, дарования Небесныя неленостно стяжавый и Заповедем Божиим научавый; Радуйся, в людях сокрытыя доброты и дарования видевый; Радуйся, словом молниеобразным тьмы греховныя рассеятелю; Радуйся, Богословием истинным витийства риторов победивый;

Радуйся, равноапостольный проповедниче святыя Веры Православныя; Радуйся, духовной твердости и смирения учителю; Радуйся, кротостью твоею бессердечных и жестоких умолителю; Радуйся, Словом Божиим верным спасение уготовляяй;

Радуйся, в скорбях и напастях страждущим скорое услышание; 

Радуйся, святый исповедниче и Христа ради юродиве, преподобне отче наш Гаврииле!


Кондак 7

Беды и напасти, гонения и страхования дьявольские от Бога не отрешили тя суть, отче Гаврииле, ибо Господь с отрочества тя ко служению иерейскому звал еси, и, ревностно блюдя Божии заповеди и с радостию Благую Весть проповедуя, отче, выну обличал и нап-равлял еси, остерегал и утешал еси великодушно паству твою, и, проповедуя, яко апостоле Павле, множество душ собирая и обращая ко Христу, с ними в праздники святых монастыри и церкви земли Иверской обходил еси, уча вси воспевати Богу:

Аллилуия!



Икос 7

Нечестивыми поруганне и оскорбленне, паче стойкость твою во всякое время хранил еси, отче Гаврииле. Тако, единожды притекл еси к Морю Черному, и моляся пред Господом, слезно помощи во страданиях просил еси, обаче внезапно в пучине оказавыйся, ибо обрушися еси брег под тобою. И икона Николая Чудотворца в руках твоих бе, и явися Святый Никола людям близу стоящим, указывая место бедствия твоего, и на помощь ти по-спешаху и, вытянув ти на сушу, с изумлением вопияху: „Благолепный Старец сей зваша нас на помощь ти" и вкупе славили Господа о чуде сем. И ныне упроси Господа, отче наш, оградити паству твою, разум нам просветити и присно святым споспешествовати на помощь нам, хвалящим и величающим тя сице:

Радуйся, друже Христов и делателю неленостный вертограда Его; Радуйся, в горних милость обретый исповеданием Веры Православной; Радуйся, Богослужения благолепное светило и ревнителю; Радуйся, любви Божественной преподателю;

Радуйся, ради спасения твоего народа крест твой на ярмо приявый и скорбьми преукрашенный; Радуйся, верных предводителю и о иереях ходатаю;

Радуися, ярости демонской отгонителю; Радуйся, служению древних отцев подражавый;
Радуйся, необоримый воине Христов, рода и Церкви Иверской велий заступниче; Радуйся, аще убо дивный старец Дивеевский Серафим проповедоваху о связе нерушимей меж Уделами Небесной Царицы, и молися о языках православных, тако и ты на ярем твой тяготу событий последних времен в судьбах языков наших приемый; Радуйся, яко сокрушатся дьяволские козни молитвами вашими и все правоверные людие,
любовию ко Христу сплоченные, доблестно вкупе послужат Ему в борбе с Антихристом и со врагами Святыя Церкви; Радуйся, праведности и мужества образе, отечества твоего слава и похвало;

Радуйся, святый исповедниче и Христа ради юродиве, преподобне отче наш Гаврииле!

 

Кондак 8


С благоговением, отче, делание монашеское впитал еси в монастыре Бетании от преподобных и богоносных отцев-чудотворцев, Георгия и Иоанна, и молитвами их преудо-бренно укрепивыйся, приступил еси к служению Богови яко инок ревностный, и, в борьбе со злом паче стали закаливыйся, удостоился еси от Господа дара ведения сердец, сим и бурю ярости сил вражиих на себя призвал еси, кои всуе пытахуся отрешити тя от монастыря, абие не можаху ни силы молитвенной, ни упования твоего на Господа победити, ниже причинити зло ни чистоте, ни служению твоему, ибо любим зело бе ты духовными отцами твоими за добродетели твоя, иже с ними вкупе возблагодарим Бога:

Аллилуия!


Икос 8

Предста преподобный Иоанн первым пред Господем, а Георгий поспеше к могиле его и к оней обратился еси, вопияху: „Христос Воскресе!" и услышал еси глас, радостне отвечаше ему: „Воистину Воскресе!". Вскоре и втораго духовника твоего силы оставили есте, и ты, блаженне, Христовых Таинств его приобщил еси, он же, в последний раз тебе благословивый, мирно почил еси, вверив Богу чистую душу свою. Зело радовашася власть имущие Церкви гонители о кончине старцев святых, и абие прервати Богослужения в монастыре поспешили есте, и приставили при онем стража, из дома Божия в музей претворив. Ты же, Отче Гаврииле, в Сион вернулся еси, и служением твоим паству велию паки собрал еси. Тако и ныне поддержи нас и настави уповати на премудрый Промысл Божий, отче и духовниче наш, и на стезю праведности направи поющих ти:

Радуйся, мудрых иноков-подвижников подражателю; Радуйся, великий ходатаю и проповедниче веры Православныя;

Радуйся, пастырю добрый агнцев избраннаго стада, яко маяк во тьме им светивый; Радуйся, овец отпадших несумненное упование и надеждо; Радуйся, Бога и веры отрешенных на путь истины возвращаяй;

Радуйся, служением твоим, Богоносне отче, плоды жатвы Господней преумноживый; Радуйся, спасшему нас от клятвы законныя кровию Своею Господу верный подражателю; Радуйся, коварства сил тьмы молитвою твоею рассекающий; Радуйся, от искушений супостата народы православныя избавляющий;

Радуйся, крепосте нерушимая, властей безбожных победителю и мирских страстей низложителю; Радуйся, верующих и служителей Божих оградо и похвало;

Радуйся, благоговейных иереев украшение и служителей кротких заступниче; Радуйся, уныния прогонителю и обреченных смерти исцелителю; Радуйся, покрове и защито путешествующим и гаване тихая - страждущим;

Радуйся, святый исповедниче и Христа ради юродиве, преподобне отче наш Гаврииле!


Кондак 9

Видяще нечестие велие множашеся в отечестве родном, благим пастырем, отче наш, малому стаду ты явился еси, ибо в неверии и скверне греховной погрязали многие и многие, обаче жаждая возвращения их благочестию, к покаянию звати я дерзал еси, неустанно вопия им со скорбию: „О, несчастные, во мгле сидящие, вы страхом и молчанием связаны, как не ведети вам света Христова и Славы Его? Прозрите абие, и узреша Христа, Бога нашего, покайтеся, отвратите стопы от злых стезей ваших и немолчно славьте Бога:

Аллилуия!

 

Икос 9

Бурю возмущения в тебе, отче наш, нечестивые иконоборцы вызывали суть, ибо сатанинскому осквернению подвергли суть святыя иконы Владыки Господа Иисуса Христа, Пречистей Матери Его и Божиих святых, а почитающих я гонениям предали суть. Ты же, не страшася смерти, яко жертву Богови, образе идола-богоненавистника,
прислужника сатаны всесожжению предал еси, и паче всех и вся ненавидим бе власть имущими за дерзость сию, и неотвратной смерти за Христа ожидал еси, дерзновенно проповедая: „Не подобает величие сицевое трупу человеческому, достойно же оное токмо Христу, воскресшему из мертвых, Спасителю и Богу нашему!" Моли же Его ныне, отче всехвальне, о спасении душ наших от ересей погибельных и даруй ревность твою о Господе восхваляющим ти сице:

Радуйся, пастырю малого стада, Словом Божиим прозрети неведящим помогавый; Радуйся, неустанно грешников на путь Божий обратитися назидавый; Радуйся, правителей-человеконенавистников и судий бесчестных дерзновенный обличителю;
Радуйся, творящих бесчинства сокрушителю и на путь Истины еретиков наставителю; Радуйся, от Божией руки отбившихся, обмирщенных сердец устыдителю; Радуйся, вознесенной гордыни века сего посрамление; Радуйся, крамолы иконоборцев разрушение;

Радуйся, от козней сатанинских и нашествия иноплеменников защитителю; Радуйся, необузданных устрашителю и ереси прелестей прогонителю; Радуйся, благим обличением народа твоего от сна духовнаго пробудителю; Радуйся, горделивых душ исцелителю и мглы умов наших рассеятелю;

Радуйся, Благоверных супругов благословителю и в прелюбодеяния впадших порицателю;

 

Радуйся, святый исповедниче и Христа ради юродиве, преподобне отче наш Гаврииле!


Кондак 10

Нечестивые мытари, хулители Христа и прислужники властей безбожных, ненавидя ти, столкнути тя с пути истиннаго решили суть, искушениям подвергнув, и в темницу заключили тя суть, но ты коварство их мужественно обличал еси, и узников Христа ради учением в вере паче наставлял и укреплял еси, и с оными вкупе славил еси Бога. А тии, что в бешенстве сгубити тя пыталися суть, спесь свою умерили абие, ибо ничесоже творити ти не можаху, иже чудом сим Господь, стена верным, от смерти тя укрыша, поместиша тя в лече-бницу, среди малых мира и отверженных, непредсказуемых и невменяемых, и попустил еси ти истязания терпети, коим несть числа. Обаче сие ожесточение сатанинское не можаше колебати несокрушимую веру твою, отче святый, и посреди истязаний, яко отроцы три в печи вавилонстей, продолжал еси славити и величати Бога:

Аллилуия!


Икос 10

Ходатайством Патриарха свободу паче чаяния обретши, абие в храм Святой Варвары ты поспешил еси утешения у Господа искати, и тамо, зело уставши, задремаше и услышаше трижды глас дивне: „Гаврииле, я плачу о тебе!" и очнувшися, абие устремися к Распятию и увидеху чудо, Иисуса слезы точащаго, и пал ты ниц еси со слезами, вознося хвалы и молитвы Господеви. Сицевое утешение получиша, к службе в Сиони возвратился еси, отче, и множества людей окормлял еси, проповедаху им покаяние и приобщаше их Таинствам Святым. Обаче и тамо отторгнул еси тя враг от служения Господеви, по промыслу власти-телей безбожных, и, нищим, без пристанища многая лета ты пребыл еси,
отче, и зной непосильный, и холод смертельный претерпети изволил еси, пребывающе посреде плит могильных, и юродства крест приял еси Христа ради, проповедаше Царствие небесное и моляшеся непрестанно, воссылая выну молитву твою горе и сим радуя Небесе. Людие же, паче видеху красоту души твоея, с любовью служаху ти, и желаху паче сретения с тобою, видя тебе ревностнаго раба Господня, страстей победителю. Таковому о тебе произволению Божиему дивящеся, зовем ти:

Радуйся, малословием твоим, яко огненным пламенем, терний страстей опалителю; Радуйся, в мирския соблазны впадших священнослужителей гневный порицателю; Радуйся, богоотступления рода своего обличителю; Радуйся, иереями-книжниками унижавыйся и оскорблявыйся;

Радуйся, помышления сердечныя ведателю, от искушений и преступлений люди ограждаяй; Радуйся, горнее благословение приявый, благодати Духа Святого щедрый одарителю;
Радуйся, честностию и добротою душевной Небесных даров стяжателю, духом горе пребываяй; Радуйся, из монастыря Бетании рой пчел улетевших осенением крестовым возвративый;
Радуйся, закрытыя врата церковныя крестным знамением отверзый; Радуйся, наследниче подвига бессмертнаго духовных отцов твоих и братьев во Христе: Иоана и Георгия Бетанийских, в борьбе за правду клятвою сплетенных;
Радуйся, безбожных врагов Христа и Уделоизбранной Иверии обличением выявляяй; Радуйся, чуда Святаго Спиридона Тримифунтскаго повторителю, мякоть хлебную в муку, огнь и воду превративый, радуйся, чудотворной силы Ликов Святой Троицы Едино-сущной прославителю; Радуйся, велиего числа священства мудрым словом назидавый и истинных иноков-монахов воспитавый;

Радуйся, святый исповедниче и Христа ради юродиве, преподобне отче наш Гаврииле!


Кондак 11

Светилом избранным средь отцев святых, отче, чудный старец наш ты был еси, ибо ниспослано ти бе Слово горней мудрости и Ведение от Духа Святаго, от Того же и благо исцелений, и помоще людям ты приял еси, и сердцеведение, и дар душ лечения, и возвышенный дар любви. Но яко отметил тебе Господь особенным смире-нием и скромно-стию дивною, тако следуя вразумлению Святого Павла Апостола ты жити изволил еси, что „Мудрость мирская есть беснование пред лицем Божиим", и тако людям предстал ты еси, отче, юродивым, пьяным и никчемным, псом Спасителя именуя ся, в сердце же неустанно воспевая Богу:

Аллилуия!


Икос 11

Яко Андрее Блаженне, имя доброе кротостью и смирением твоим стяжал еси, и по множеству добродетели твоя безумцем Христа ради стал еси, мужественный старец наш, и взвалил еси на раме твои двойную тягость в подвизех Затворника и Юродивого, миру непостижимых, и не раз представлял ти ся людям яко в пиянстве живуще, покрываяй сим святость твою и дары твоя. Обаче, о мудрый иноче, аще и миру безумне объявлен был еси,
ныне же почиваеши в сонме святых Церкви Иверской и обладая велиим дерзновением ко Господу, моли Его паки явити нам достойных отцев и предводителей мудрых, дабы не попустити растления Иверии - удела Богоматери, дабы творити нам правду Богови, со умилением взывая и воспевая ти сице:

Радуйся, таинства небесные являяй, яко заискрися еси ты светом Божественным в нечестивую пору гонений на Истину и умаления благочестия, и просветил еси народ свой святостию твоею; Радуйся, прозорливе отче наш и молитвенниче, духовней премудрости преисполненне,ибо разуму человеческу несть доступно постигнути открывашеся ти высоты недосягаемыя; Радуйся, Божественным огнем зело воспламенивыйся, в овечьи шкуры облаченных волков- священнослужителей обличителю был еси, яко Илья-пророк, обличавый жрецов Бааловых; Радуйся, великому Моисею подобне, четыредесять лет Крест свой носивый, ибо хранил еси ты в себе слово Божие, столпе нерушимый, и не крепость человеческую, но Силу Божию явил еси; Радуйся, яко пророк Давид милость Божью в смирении заслуживый и проповеданием

Благовестия Христова, яко пращой, козни Безбожных сокрушивый; Радуйся, Иоанну Крестителю подобне, грешных неустанно у диавола исхищавый и покаянием к Богу возвращавый;

Радуйся, яко Иоанне Богослове, любви Божией апостоле, ибо ему подобне, вкупе с даром любви дарованы и ти бяху тайны Божии и власть на духи нечистыя; Радуйся, ибо испытаниям радовался еси, наставлявый и нас терпением страданий в вере закалятися;

Радуйся, ибо в скорбех и в вечных гонениях первомученикам подобен был еси, выну плачуще токмо о греси твоя; Радуйся, ибо скорбел ты еси о душе твоей, Велиару неугодней, яко о покойнице, и, причитая, взывал еси еси яко разбойник благий: „Токмо помяни мя, Спасе, во Царствии Твоем!"; Радуйся, муже небесный, бегавый величия мирскаго, тако да хвалят отныне и во веки притекающие тебе дивные дела твоя; Радуйся, Пречистую Богоматерь умолявый об умножении рода Иверскаго, тако и явися ти
в видении бесчисленне множество младенцев во утробех убиенных, и ужаснувшися, увидел еси Пречистую Царицу со ангелы и услышал еси скорбный глас ея: „Зачем просите ми умножения, дабы тако убивати младенцев во утробех материных?!"

Радуйся, святый исповедниче и Христа ради юродиве, преподобне отче наш Гаврииле!



Кондак 12

Печаляся, в смирении твоем и кротости, с велиим терпением многия лета ожидал еси ты благословения ко священослужению, и узрев в нижайшей скромности твоей горячее желание Богови служити, Патриарх Ефрем пригласил тя еси паки ко алтарю, облача в ризы иерейския и, приобщив тя Тайн Христовых, по внушению горнему во святую обитель монастыря Самтавро отправил тя еси, и обосновался еси ты тамо, жителю Небесного Иерусалима, во Иерусалиме Новом, во Граде Владычнем Мцхета, у куста
купинного Святыя Нины, просветительницы Иверии, в малой келии, и како с трепетом приношению Жертвы бескровныя и проповеди Царствия паки отдался еси, чудотворениями вразумляя монахини и паству твою, указуя им врагов видимых и невидимых, и, моливыйся непрестанно, обитель от бед оградил еси, и благоукрасил еси башню святаго Царя Мириана спасенными крестами и иконами твоими, денно и нощно славя в Троице Единаго Бога:

Аллилуия!

 


Икос 12

Яко настоящее будущее зревый, отче дивне, силою, принятою свыше, многие чудеса сотворил еси ты по любви к нам, укрепляя Веру и являя силу Божию, в немощи совершаемую; и паче тяжким недугом будучи объят, блаженне старче наш, стойко переносил еси боли нетерпимыя, до конца дней твоих несый тяжкий крест страданий телесных. Прозрев же в Духе о часе кончины твоея, отче святый, помоливыйся пред иконой Святителя Николая Чудотворца о благословлении народа и Отечества твоего, тихо мир сей оставил еси, напоенный добродетелями твоима, и к великому сонму святых отцев присоединился еси; и по завещанию твоему яко древняго инока-старца предали земли мощи твоя, в циновку завернувше я. И абие святые мощи твоя явилися источником чудес неупиваемым для народа Божия и кладезем целительным от болезней и недуг, яко сокровище благодати Духа Святаго и знамение оставления многих грехов наших и избавления от болезней, душевных и телесных. Темже убо спешим с велией радостию в обитель Самтавро, идеже ты, отче, почиваеши, и всякий притекающий ти с верою, приняв помазание маслом лампады твоея, яко же от тебе благословление, получая сим здравие духа и телеси, немолчно славит тя сице:

Радуйся, терпением мир благодатный стяжавый, и, яко старец-инок не однажды ценою жизни твоея злу противостоявый, моли выну Христа Бога о спасении душ наших; Радуйся, яко и по смерти нам живым и близким остался еси, желанный и ангельский помощниче в веке тягостном; Радуйся, венцем исповедническим увенчанный, и по кончине твоей озаряеши нас, яко солнца горячий луче, и непрестанно призываеши нас ко Христу; Радуйся, ибо пристанище твое вблизи купины есть крепосте и сила дивная, и радосте наша,яко владельцы благоухающей сокровищницы, благодатию одаряющей; Радуйся, ибо по промыслу Божиему и мати твоя, тебе последоваши, ста на путе испо-ведания веры и в монашеском подвизе подвизалась еси, и погребена еси тамо жде, в святом монастыре близ мощей твоих; Радуйся, в бедах находящимся благое прибежище, якоже огонь Божественный, светящий от усыпальницы твоей, палит козни богоборцев, и теплым победным светом осеняет нас, от греховной тьмы ограждающе; Радуйся, ибо не токмо верующие, но ныне и ленивые, и маловерные спешат приложитися
к сосуду с нетленной кровию твоею, и молят ти ся о милости; ты же, внимая мольбам, исполняеши благия желания их, и в скорбех радость щедро подаваеши; Радуйся, ибо видяше архиереи чудеса изливающеся от могилы твоея и множество
происходящих по милости твоей и величая тебе яко великаго инока, исповедника и юродивого, причислиша тя лику святых; Радуйся, ибо видяху многия священнослужители исцеления приходящия от могилы твоея,и ныне вкупе с паствой их величают тя яко великаго святого, вознося ти молитвы и хвалы;

Радуйся, блистанием чудес твоих народ Божий щедро одаривый, ибо иконы и образы твои суть источники мироточивыя, Духом Святым исполненныя; Радуйся, ибо ныне радостью преисполнен град царственный Мцхета, и радуется обитель Самтавро святыя мощи твоя имеющи, люди же Иверии притекают в нея неустанно, воспе-вающе святость, исцеления и пророчества твоя; Радуйся, небурная пристань спасения погибающих и надеждо ненадежных, яко велим ходатаем явился еси ты страждущим от бед, и Божественной силой щедро одаряеши всех к тебе притекающих, и неусыпным покровом париши над отчизной твоей и народом твоим;

Радуйся, святый исповедниче и Христа ради юродиве, преподобне отче наш Гаврииле!

 

Кондак 13

О, преславный и предивный пастырю и угодниче Христов, святый исповедниче и Христа ради юродиве, отче наш Гаврииле! Господь наш Иисус Христос благослови тя на дела велие, разуму человеческому неудобоприемные, и оказа ти богатую милость в жизни сей временней, а по святой кончине твоей ущедрил еси тя даром с дерзновением ходатайствовати о душах грешных. Приими и ныне малое сие моление наше, с любовию ти приносимое, и теплым предстательством твоим испроси Владыку Христа Бога избавити нас от греха и нечестия, от бед и напастей, и наследниками Царствия Небеснаго быти сотвори, да с тобою вкупе немолчно воспоем Богу:

Аллилуиа!

(Этот кондак читается трижды. Затем Икос 1 и Кондак 1)

 

Молитвы:

 

О, всехвальне отче Гаврииле, исповедниче и юродиве! Украшение иноков, священников венче и ангелов сорат-ниче, избранный воине богохранимой Грузии и защито необоримое от напастей и бед всем молящим ти ся, дерзновенный ходатаю пред Господом о всех с верою ти притекающих и иной надежды не имущих, обреченных оградо и немощных покрове!

 

О, соратниче сонму исповедников и юродивых, всечудне отче Гаврииле! Избраша издества жизнь ангельскую, облекся еси ты в схиму монашескую в пору торжества нечестия, и ныне содействием твоим даеши нам мудрость и стойкость и силу непобедимую для защиты Веры и Отечества нашего, ибо бесчисленные орды врагов Истины над Святым Православием и ныне, яко прежде, коварно надругатися тщатся, действуя повадками и силою лукавого зверя, для растления народов Божиих и претворения их в служителей тьмы. Мы же, во мгле греховной пребывая, не в силах есмы им противостояти, обаче ходатайством твоим, отче святый, умоли Христа Бога удостоити нас исполнения пророчеств твоих и явити нам Царя, на царство Богом помазанного,доблестнаго правителя и предводителя нашего. Яви его, яко явил еси Давида царя Израилю, дабы правити ему верою, добротою и истиною и жити заботой о народе нашем, языке Удела избранного Матерью Божией, дабы несл еси Крест Господень, неотступно следуя Ему в Вере Православной, дабы преумножил еси былую честь и крепость ея, дабы бесчисленные демоны окаяннством своим не смели паче хулити Христа Бога нашего в пределах ея и сквернити Святую Веру нашу. Всесильною и теплою молитвою твоею, отче наш, покрой и укрепи Святейшего и Блаженнейшего Католикоса - Патриарха всея Грузии, Архиепископа Мцхетско-Тбилисского и Митрополита Пицундского и Цхум-Абхазского, отца нашего Илию, всех патриархов Святых Православных Церквей Твоих и всех священнослужителей: митрополитов, архиепископов и епископов и весь священнический и монашеский чин, и весь причет церковный, и всех молящихся и подвизающихся в Церкви Святой Православной, и всех Православных Христиан!

 

О, Святый отче наш Гаврииле! По заслугам твоим пред Господом, подобным подвигам апостольским, и ведая о великом твоем к нам милосердии, по завету твоему, со смирением молим ти об освобождении от музейного плена Нерукотворного Образа Спасителя нашего и водворения его в Соборную церковь имени Его святаго, в преддверии явления Ацкурского Нерукотворного Образа Пречистой Девы и Славного возвращения в страну Иверскую образа Портаитиссы, Вратарницы, „яко величайшей споручницы вызволения нашего от сатанинских сетей и искушений антихристовых", по пророчествам святых отцов наших, ибо в знак наступления последних времен покинет образ сей Гору Афонскую и осветит паки Иверию, удел свой избранный. Обаче свирепствует еще нечестие по наущению дьявольскому в Уделах Богоматери, и народы наши увязли во гресех и лукавых сетях мира сего, и мы же, леностью объятые, со страхом чаем величественнаго и страшнаго Второго пришествия Спасителя нашего Иисуса Христа. Темже молим тя, отче святый Гаврииле, отжени от нас ужас кары Божией за неверие и беззакония наша, и милосердием твоим умоли Христа, Бога Всемилосерднаго, помиловати души наша и просветити сердца наша Православием и благочестием, дабы возрастати в нас добродетелем, а, по отходу от мира сего, с Царством Небесным нам слития вымоли, дабы с ангельскими сонмами быти выну поющими Господеви Богу нашему, в светлых селениях Его вечного бытия, вкупе со Святителями нашими, и с тобою, отче, быти выну воспевающими пресвятое имя Его, со Безначальным Его Отцем и Пресвятым и Благим и Животворящим Его Духом, ныне и присно и во веки веков.

Аминь!

 

 

 

 

Это интересно
0

24.03.2018
Пожаловаться Просмотров: 13225  
←  Предыдущая тема Все темы Следующая тема →


Комментарии временно отключены